Balozi Idd azitaka kampuni za Oman kutumia fursa ya rasilimali zilizopo Zanzibar kuwekeza vitega uchumi vyao.

Mwakilishi wa Kampuni ya Kimataifa ya Kibiashara ya Shanfar & Patners ya Mjini Salala Nchini Oman Bw. Ali Omar Al-Sheikh akizungumza na Makamu wa Pili wa Rais wa Zanzibar Balozi Seif Ali Iddi Ofisini kwake Vuga Mjini Zanzibar.

Makamu wa Pili wa Rais wa Zanzibar Balozi Seif Ali Iddi akizungumza na Ujumbe wa Viongozi watano wa Kampuni ya Kimataifa ya Kibiashara ya Shanfar & Patners ya Mjini Salala Nchini Oman uliofika ofisini kwake. 

Balozi Seif akiiomba Kampuni ya Kimataifa ya Kibiashara ya Shanfar & Patners ya Mjini Salala Nchini Oman kupitia Mwakilishi wake Bw. Ali Omar Al-Sheikh kutumia fursa zilizopo za rasilmali Zanzibar kuwekeza vitega uchumi vyao Nchini.

Makamu wa Pili wa Rais wa Zanzibar Balozi Seif Ali Iddi na Mwakilishi wa Kampuni ya Kimataifa ya Kibiashara ya Shanfar & Patners ya Mjini Salala Nchini Oman Bw. Ali Omar Al-Sheikh wakibadilisha mawazo katika masuala ya uwekezaji Zanzibar.

Makamu wa Pili wa Rais wa Zanzibar Balozi Seif Ali Iddi akiwa katika picha ya pamoja na ujumbe wa Viongozi watano wa Kampuni ya Kimataifa ya Kibiashara ya Shanfar & Patners ya Mjini Salala Nchini Oman baada ya mazungumzo yao yaliyohusu suala la uwekezaji hapa Nchini. (Picha na Hassan Issa wa – OMPR – ZNZ).

Kampuni ya Kimataifa inayojishughulisha na masuala ya Kibiashara ya Shanfar & Partners  Co. L.L.C yenye Makao makuu yake Mjini Salala Nchini Omar imeonyesha nia ya kutaka kuwekeza vitega uchumi vyake Zanzibar.

Nia hiyo imekuja kufuatia Visiwa vya Zanzibar kubarikiwa kuwa na rasilmali kadhaa ambazo bado hazijatumika katika kusaidia kuendeleza uchumi wa Taifa sambamba na kuongeza vipato kwa wananchi.

Mwakilishi wa Kampuni hiyo Bw. Ali Omar Al–Sheikh akiuongoza ujumbe wa Viongozi watano wa Kampuni hiyo alieleza hayo wakati akizungumza na Makamu wa Pili wa Rais wa Zanzibar Balozi Seif Ali Iddi Ofisini kwake Vuga Mjini Zanzibar.

Bw. Ali Omar amesema ujumbe wake umeridhika na rasilmali kadhaa zilizomo ndani ya Visiwa vya Zanzibar baada ya kupata fursa ya kutembelea maeneo mbali mbali Mijini na Vijijini.

Amefahamisha kwamba Taasisi yao itaangalia maeneo inayoweza kuwekeza baada ya kufanya uchambuzi wa kina wakilenga zaidi katika Sekta ya Utalii ambayo Zanzibar tayari imeshafikia hatua kubwa katika kuimarisha miundo mbinu ya sekta hiyo.

Naye Ofisa Mkuu wa Kampuni hiyo ya Shantar & Partners Bw. S. Srihar amemueleza Makamu wa Pili wa Rais wa Zanzibar kwamba katika jitihada za kusaidia maendeleo ya Zanzibar Kampuni yao ina uwezo wa kuyashawishi mashirika na Makampuni ya Kimataifa ya watembezaji Watalii kulitumia soko la Zanzibar la Utalii katika kutembeza wateja na wageni wao.

Bw. Srihar amesema kufanikiwa kwa mpango huo kunaweza kutoa nafasi ya ajira kwa wazalendo waliowengi Nchini  hasa lile kundi kubwa la vijana wanaomaliza masomo yao.

Akitoa shukrani zake Makamu wa Pili wa Rais wa Zanzibar Balozi Seif Ali Iddi aliueleza Ujumbe huo wa Kampuni ya Shanfar & Partners ya Salala Nchini Oman kwamba Serikali ya Mapinduzi ya Zanzibar bado inaendelea na juhudi za kuimarisha miundo mbinu katika sekta mbali mbali za Kiuchumi hapa Nchini.

Balozi Seif  alifahamisha kwamba uimarishaji wa kiwanja cha ndege cha Kimataifa cha Zanzibar ni miongoni mwa hatua hizo kwa lengo la kujenga mazingira mazuri ya uwekezaji.

Makamu wa Pili wa Rais wa Zanzibar aliushauri Ujumbe huo wa Kampuni ya Kibiashara ya Shanfar & Partners kuitumia fursa hiyo ili isaidie uchumi wa Zanzibar sambamba na kuimarisha uhusiano wa Kihistoria uliopo kati ya Zanzibar na Oman.

Kampuni ya Kimataifa ya Kibiashara ya Shanfar & Patners Co. L.L.C  ya Salala Nchini Oman imekuwa na ubia wa kibiashara na zaidi ya Makampuni saba ya Kimataifa katika Nyanja za Viwanda, Usafiri wa Anga, Utalii, huduma za Umeme, ujenzi na Uchapishaji.

Chanzo brownbreez.blogspot.com